Questo è Carolus Cergoly , grande e poco letto poeta triestino.
Leggete (e riflettete) su questi testi, tra i suoi più famosi.
El suo nome: bandito
Al comando portà
in cadene ligà
rosso fazzoletto garibaldin
intorno al collo
boia assassin
quatro giorni
i lo ga torturà
"Parla bandito - bandito parla"
bocca serada
muto da sempre
povere man
senza ongie pianzeva
sbregado
in cella ributà
Drio giorno morto
lo ga trovà
viso sorridente - viva la libertà
bocca rossa
fazzoletto al collo
nudo el xe sta interà
el suo nome "bandito"... e
un cartelon sul petto
"benzina sabotò alla Decima M.A.S."
O bella ciao o bella ciao
viva la libertà
Fuma el camin
Fuma el camin
mattina e sera
del lagher de Mathausen
grande fratel de quel
de la Risiera
lacrime e sangue
piovi su Trieste
Lotte Hen
camicia bruna
e svastica sul brazzo
al suo primo servizio
al "Bloko 33"
donne e bambini
morsigar de coscienza
disi el Kapò perchè
sù femo i bravi
in fondo xe un brusar
ebrei e slavi
Intanto a Ginevra
stasera "Parsifal"
di Richard Wagner
Toscanini dirige.
da "Ponterosso"
Poesia d'un Barbon
scritta per farse coraggio
sotto el Ponterosso
su carta d'imballaggio
senza nissun
che te dia qualcossa
magari anche una piada
un pugno una sberla
senza una strada
che porti a qualche fermo
senza un numero
per dir
stago de casa qua
senza una man
tenera de dona
che coccoli in amor.
Coparse e dopo
l'Isola dei Morti
in quadro la go vista
un polveron de noia
a l'infinito
morto isolà va ben
ma
almeno saver qualcossa dei vivi
se gà piovù in Farneto
se bora scura
fa rabiar el mar
Vita te voio ben
ma no ogni giorno
domenica in loculo
ma lunedì alle cinque
zo in Ponterosso
vivo
